سانحہ مستونگ پر عالمی برادری بھی غمزدہ، واقعے پر افسوس و مذمت

اسلام آباد( رفعت سلیم ) بلوچستان کے علاقے مستونگ میں ہونے والے دھماکے پر سعودی عرب، امریکا، برطانیہ، جرمنی اور یورپی یونین کی جانب سے شدیدمذمت کی گئی ہے۔مستونگ میں گزشتہ روز ہونے والے خودکش حملے پر عالمی برادری بھی غم زدہ ہے، عالمی رہنماؤں نے دہشت گردی کیخلاف جنگ میں پاکستان کو مکمل تعاون کا یقین دلایا ہے۔اقوام متحدہ نے پاکستان میں انتخابی ریلیوں اور امیدواروں پر حملوں کی شدید مذمت کی ہے۔ اقوام متحدہ کے سیکریٹری جنرل نے متاثرہ خاندانوں اور حکومت پاکستان کے ساتھ افسوس کا اظہار کیا۔ترجمان سیکریٹری جنرل اقوام متحدہ کا کہنا تھا کہ دہشت گردی کے خلاف جنگ میں پاکستان کی کوششوں کی حمایت کرتے ہیں۔سعودی سرکاری نیوز ایجنسی کے مطابق شاہ سلمان بن عبدالعزیز نے صدر ممنون حسین کو تعزیتی پیغام میں مستونگ دھماکے میں قیمتی جانوں کے ضیاع پر اظہار افسوس کیا۔شاہ سلمان کا کہنا تھا کہ سعودی عرب اس مجرمانہ حملے کی شدید الفاظ میں مذمت کرتا ہے اور شہداء کے لواحقین اور اسے تمام پاکستانی عوام سے دلی ہمدردی ہے۔ سعودی حکومت اور عوام اس مصیبت کی گھڑی میں پاکستان کے ساتھ ہیں اور پاکستان اور پاکستانی عوام کی حفاظت کے لیے اللہ تعالیٰ سے دعاگو ہیں۔ سعودی ولی عہد شہزادہ محمد بن سلمان نے بھی صدر ممنون حسین کو تعزیتی پیغام بھیجا ہے۔جرمن چانسلر اینجلا مرکل نے نگران وزیراعظم ناصرالملک کے نام تعزیتی پیغام میں مستونگ خودکش حملے کی مذمت کرتے ہوئے کہا کہ بلوچستان میں انتخابی مہم میں دہشت گرد حملے پر شدید دکھ ہوا اور دہشت گردی کے خلاف جنگ میں پاکستان کے ساتھ کھڑے ہیں۔امریکی محکمہ خارجہ کی جانب سےجاری ایک بیان میں کہا گیا ہے کہ حملے پاکستانی عوام کوجمہوری حقوق سےمحروم کرنے کی کوشش ہے۔امریکی محکمہ خارجہ کے مطابق دھماکوں میں مرنے والوں کے اہلخانہ سے تعزیت اور زخمیوں کی جلد صحتیابی کے لیے دعاگو ہیں جب کہ خطے سے دہشت گردی کے خاتمے  کے لیے پاکستانی عوام کے ساتھ ہیں۔یورپی یونین نے مستونگ میں انتخابی جلسے میں خودکش دھماکے میں انسانی جانوں کے ضیاع کی مذمت کی۔ یورپی یونین کا کہنا تھا کہ دھماکے میں جاں بحق افراد کے اہل خانہ سے تعزیت کرتے ہیں۔یورپی یونین کے مطابق حالیہ حملوں کی مکمل تفتیش کی اشد ضرورت ہے اور توقع ہے پاکستانی حکام انتخابی سرگرمیوں کی سیکیورٹی یقینی بنائیں گے۔پاکستان میں تعینات برطانوی ہائی کمشنر تھامس ڈریو نے اپنے ایک بیان میں متاثرہ خاندانوں سے اظہار ہمدردی کرتے ہوئے کہا کہ کسی کو بھی جمہوری عمل میں رکاوٹ ڈالنے کی اجازت نہیں دی جاسکتی۔قطری وزارت خارجہ نے مستونگ میں خود کش حملے کی شدید مذمت کی، پاکستان اور شہید ہونے والوں کے اہل خانہ سے اظہار تعزیت کیا۔